بعد السخرية من حلاقة شعرها.. أسما شريف منير: ده شعري مش شعركم.. وعاجبني جداً
تحدثت خبيرة التجميل أسما شريف منير عن حالة الجدل المثار حول حلاقة شعرها، وسخرية البعض منها، ما جعلها تتصدر مؤشرات التريند.
ونشرت أسما شريف منير صورًا لها باللوك الجديد من حفل افتتاح مهرجان القاهرة للدراما في مدينة العلمين، وقالت: طيب أول حاجة شكرًا على كل ردود الفعل، الوحشة والحلوة كلها، ساعات موقف زي دي بتخلي ناس تشوف ناس تانية عاملين ازاي مجرد إنهم بيعبروا عن رأيهم، وشكرًا لكل الناس اللي كانت خايفة وقلقانة عليا، ممكن بقي أقولكم الحكاية من وجهة نظري ببساطة.
وأضافت: أولًا الحكاية جت بالصدفة جدًا وكان قرار لحظي وانفعالي جدًا ومش ندمانة عليه، تاني حاجة أنا مش بعمل كده عشان اطلع ترند بس كنت عارفة إني هبقي ترند، في فرق كبير بين عايزه وعارفة، علي فكرة الترند ده نقمة مش حاجة حلوة خالص بس مش هدخل في الجدل ده دلوقتي، تالت حاجة أنا الحمد لله كويسة ومبسوطة ومش واخدة الخطوة دي بسبب اكتئاب خالص بالعكس، دي صفحة جديدة حلوة مليانة تفاؤل وقوة وإرادة وتحدي وجرأة وشجاعة وكل حاجة إيجابية في الكون، أنا فعلًا من فترة كنت بمر بمرحلة صعبة جدًا بس كنت في رحلة بقالي شوية بتعافي منها وبقف على رجلي من الأول وكان آخرها رحلة دهب، فتاني بالعكس ده مش اكتئاب ده مرحلة انتقالية مؤمنه إني هحقق فيها حاجات كتير.
واختتمت أسما شريف منير حديثها قائلةً: آخر حاجة الجماعة اللي مكبرين الموضوع ده شعري مش شعرك، حاجة كده بجد أخيرة أنا عاجبني شكلي جدًا بصراحة، شكله جامد ومديني ثقة في نفسي جدًا، بحبكم أوي بجد.
