لقاء الخميسي: بكلم بابا المتوفي كل يوم وبيرد عليا

تحدثت الفنانة لقاء الخميسي عن أيام طفولتها مؤكدة أنها فترة سعيدة في حياتها، قائلة: “الطفولة كانت جميلة ولما بفتكر الطفولة أول حاجة بفتكرها بابا، أنا بموت فيه هو الرجل الأول والأخير وبعد كدا يجي في النص شوية رجالة”.

وأضافت خلال لقائها مع الفنان تامر شلتوت في برنامج “in deeb”: “ولما بنتكلم عن الأب أنا بشوف بابا صحبي وصديقي اللي مبخبيش عنه حاجة وبشوفه راجل مختلف وفنان وحساس وراقي وطيب كل الصفات الحلوة لما بيتعصب بتبقي الدنيا وحشة وهو صوتي الداخلي بكلمه لحد دلوقتي وهو بيرد عليا  وبكلمه كل يوم وبحكي له الحاجات الحلو والوحشة وبتحصل علامات فبقول أها ده رد وهو طبعا إنسان مش موجود بس بيكون في علامات”.

و أضافت: "وهو توفي بمرض السرطان والدكاترة قالوا إن دي النهاية".

وكذلك كشفت الفنانة لقاء الخميسي عن تفاصيل تعرضها للخيانة، أثناء فترة ارتباطها من شخص بمرحلة دراستها بالمعهد، إذ أشارت إلى أنها كانت تعلم بعلاقاته النسائية الكثيرة، ولم تعترض عليها، لكن بعد علمها بخيانته تركته بشكل نهائي، ولم تخبره بسبب اختفائها.

حيث قالت: “دخلت في علاقات فاشلة، واتعلمت منها إن مش كل اللي أنت عايزه هتاخده، هتاخد الراجل اللي تتكيف معاه، أنت هتحبه بعبله.. بالحاجات الكويسة وغيرها، مش هتقدر تلاقي شخص راسمه في خيالك”.

وتابعت لقاء الخميسي: “عبد المنصف مش شبهي خالص، مفيش حاجة شبه بعض فيها غير إننا إحنا الاتنين طيبين، حبيت وأنا في المعهد مكنش حب جواز أو ارتباط، اتعرضت للخيانة مرة واحدة في حياتي، هو كان شخص بيخون على طول، وكنت عارفة إنه عارف بنات كتير، لما خاني مشيت ومقولتلوش السبب، مبمشيش وأنا مريحاك، ومبردش على تليفونات نهائي، بتعامل بالبلوك”.

وتابعت الخميسي: على مدار حياتي متخانتش من أصدقاء كتير، لأني باخد بالي بصاحب مين، فيه ناس ضربت من تحت الحزام، بس مش مهمين في حياتي، وفي ناس مهمة خانتني، وزعلت وقعدت في البيت وعانيت، لكن تعاملت معاهم بالبلوك ومردتش على إهانتهم، لإني عارفة إني من جوايا كبيرة وميصحش أرد.

وأضافت الخميسي: "سكتّ 7 سنين على الإهانة، متئذنيش في مشاعري، في ناس لفت من ورايا عشان تاخد أدواري في بعض الأعمال الفنية، بس دلوقتي بقيت بسامح، بتعامل إنه مش من نصيبي، إحنا جايين الدنيا علشان نتعلم، طول ما بغلط بتعلم.