محمد علي رزق: معلومة مسلسل "ليه لأ" غلط.. وأنا ضد تقييد الحريات

بعد الهجوم عليه، حرص الفنان محمد علي رزق على تقديم اعتذاره عن رأيه في مسلسل ليه لأ 3، بطولة الفنانة نيللي كريم، مشيرًا إلى أنه ضد تقييد الحريات، بينما اعترض على التفرقة بين كلية آداب قسم مسرح وأكاديمية الفنون.

تعليق محمد علي رزق على أزمة ليه لأ 3 

وقال محمد علي رزق، خلال مقطع فيديو، نشره عبر حسابه الشخصي على إنستجرام: "بعد بيان النقابة، أنا قررت انسحب من الصورة تمامًا؛ لأن النقابة مشكورة طلعت البيان بتستنكر اللي حصل وبتهيب الشركة إنها تعتذر عن الخطأ وتحذف المشاهد، صحيت من النوم لقيت رسائل إني ضد حرية الإبداع وضد حرية الرأي وإن دي شخصيات درامية وإن ده كلام بيتقال على لسان شخصية درامية مش كلام في الشارع عشان ناخد ضده إجراء".

وأضاف: "ناس كتير قالتلي إن زي ما كان عندك الشجاعة وطلعت وطلبت من الناس تعتذر وصححت المعلومة الغلط اللي في المشهد لازم يكون عندك الشجاعة عشان خاطر تمنع تأييد الحريات، تمام يا جماعة مش هكابر أنا ضد تقييد الحريات وعايز أعيد وأكرر معلومة إني من جمهور مسلسل ليه لأ وقولتها في البوست والفيديو الأولاني ومعنديش مشكلة مع العمل نهائيًا أنا عندي مشكلة مع معلومة غلط".

وتابع محمد علي رزق: "إحنا مش كلية نظرية يا أساتذة، إحنا كلية عملية، الشركة مشكورة وناس محترمين وورشة سرد وطلعوا بيان بيعتذروا فيه وبيقولوا إنهم بيفرقوا بين التجربة النظرية والتجربة العملية، آداب مسرح نظرية والأكاديمية تجربة عملية، أنا بردو بصحح المعلومة اللي في البيان يا فندم إحنا كلية عملية بندرس نفس مواد أكاديمية فنون وبندرس تعبير حركي ومناهج إخراج وفوكاليز ونوتة وكل المواد اللي بيتم تدريسها في أكاديمية الفنون بيتم تدريسها في آداب مسرح في جميع أنحاء مصر".

تصريحات محمد علي رزق

واستطرد محمد علي: "النقطة التانية إني أقول من الفيديو ده والفيديو اللي فات مش إثبات إني ممثل شاطر أو إني معايا شهادة عظيمة، خالص، الحمد لله الواحد في المهنة من زمان ودلوقتي عندي 37 سنة وبشتغلها من وانا عندي 15 سنة، فمش هاجي النهاردة أقول أنا ممثل، وراضي بحكم الجمهور وإن شاء الله أكبر عشان كده، أنا بتكلم عشان الطلاب الصغيرين اللي لسه بيشقوا طريقهم وبصححلهم المعلومة المغلوطة".

واختتم محمد علي رزق قائلًا: "وأقسم بالله العظيم لا آداب مسرح ولا أكاديمية ولا الجن الأزرق بتعلم تمثيل الموهبة ثم الموهبة ثم الموهبة، فيه نجوم كتير على الساحة مدخلوش لا المعهد ولا آداب مسرح، أنا ضد تقييد الحريات ونقول أي حاجة وقد تكون غيرتنا الفنية على القسم بتاعنا حركتنا.. فأنا بقول إن المعلومة اللي في المسلسل غلط مش أكتر ولا أقل، حابين تقولوا حاجة براحتكم وأنتوا حرار وشكرًا على البيان بتاع الشركة اللي كان غلط بردو إحنا مش دراسة نظرية وإحنا دراسة عملية".