بسبب مشهد المسرح.. محمد علي رزق يهاجم مسلسل "ليه لأ 3"
هاجم الفنان محمد علي رزق، مشهدا يخص المسرح في مسلسل ليه لأ الجزء الثالث، بطولة الفنانة نيللي كريم.
هجوم محمد على رزق على مسلسل ليه لأ
وشارك محمد علي رزق، عبر حسابه الشخصي على موقع فيس بوك، منشورًا، انتقد من خلاله مؤلفين مسلسل ليه لأ الجزء الثالث، في مشهد قال: "هو إحنا مش بنعلم تمثيل أوي يعني..أكاديمية الفنون هي بتاعت التمثيل اللي بجد".
وانتقد محمد على رزق ذلك المشهد، مؤكدا أن كلية الآداب قسم مسرح، تخرج فيها العديد من الممثلين الكبار داخل الوسط الفني، وكتب محمد علي رزق في منشور: "بتفرج على مسلسل ليه لأ الجزء الثالث، ومنكرش حبي الشديد لمسلسل ليه لأ من الجزء الأول علشان بيناقشوا قضايا مهمة وبشكل مختلف وفي كل مرة قدروا يلمسوا الناس، وفي الجزء الأخير بيناقشوا قضية مهمة جدا ومنتشرة بنسبة كبيرة أوي في مجتمعنا الشرقي، بس شوفت مشهد عزومة في حلقة 8 وفجأة في آخر المشهد إتنين ممثلات لطاف جدًا".
وأضاف محمد علي رزق: "طبعًا أكاديمية الفنون البيت الكبير والصرح اللي طول عمره مليان أساتذة كبار وطلع أجيال كتير مهمة، تصحيح للأساتذة إللي كتبوا المسلسل، لأ يا فندم قسم آداب مسرح بيعلم تمثيل بجد، وفيه نجوم خريجين قسم آداب مسرح زي فتحي عبد الوهاب وسامح حسين وأحمد فتحي وياسر الطوبجي وغيرهم كتير أوي، وفيه دكاترة محترمة بتعلم التمثيل اللي بجد، وأنا بتشرف إني خريج كلية الآداب قسم علوم المسرح".
واختتم محمد علي رزق: "كنت أتمنى مناقشة المشاكل اللي بتقابلها أقسام المسرح في أغلب الجامعات، زي النظر لينا نظرة إيه الهبل ده وإن كل أقسام كلية الآداب شايفين إننا عيال هايفة علشان بندرس فن، ويقعدوا يتريقوا لعدم فهمهم قيمة الفن اللي كنا بندرسه".
مسلسل ليه لأ 3
ويعد مسلسل ليه لأ بطولة الفنانة نيللي كريم، ويضم مجموعة من الفنانين، أبرزهم: أحمد طارق، عايدة رياض، نادين، معتز هشام، وآخرون، والعمل من تأليف ورشة سرد لـ مريم نعوم وفكرة سارة الطوبجي وإخراج نادين خان.
