بعد سقوطها على المسرح.. نجوم الفن يدعمون شيرين عبد الوهاب

يدعم نجوم الفن الفنانة شيرين عبد الوهاب، بعد حادث سقوطها على المسرح من حفلها الأخير في دبي، بعدما هاجمها بعض الجمهور.

الفنانة شهيرة تدعم شيرين عبد الوهاب

وعلقت الفنانة شهيرة، على هجوم البعض على شيرين عبد الوهاب، بعد سقوطها الأخير، و نشرت صورا لشيرين عبد الوهاب من الحفل خلال حسابها الشخصي بموقع التواصل الاجتماعي فيسبوك، قائلة: "شوفوا بقي أنا عمري ما اتكلمت في أي وقت عن أزمه شيرين لأنها حاجة شخصية وندعيلها وخلاص ربنا يخرجها منها على خير".

وأضافت: "لكن اضطريت اتحشر لأن اللي بيحصل ده  كتير كلنا عارفين أزمتها والست بتحاول وتجاهد تخرج منها بأنها بتسترد نفسها وفنها وتاريخها الجميل اللي طالما أسعدتنا بيه، فلا نقسو عليها ولا نكسرها لمجرد أنها وقعت على المسرح زيها زي كتير ونجيب القديم والجديد إيه يعني؟ بنتلكك ولا إيه".

وتابعت: "شيرين في النهاية إنسانة تخطئ وتصيب وشرين زي ما أنتم عارفين، من المطربات السوبر اللي يتعدوا على أصابع اليد الواحدة، ولا نريد أن نخسرها هي تحتاج لجمهورها اللي بيحبها لا تحبطوها هي تريد المساندة وبتقولكم أنا رجعت أهو  لحضنكم فلنمد لها يد الحب والعطاء، فقد أعطتنا سنين طوال أمتعتنا فيها بفنها فلا نبخل عليها بيد الاحتواء والمساندة.. على فكرة عمري ما اتقابلت أنا وشيرين شخصيًا ولكنها مشاعر".

نادية مصطفى تدعم شيرين عبد الوهاب 
وعلقت المطربة نادية مصطفى، على الساخرين من شيرين عبدالوهاب بعد سقوطها على المسرح، حيث قالت عبر صفحتها: «مرة ماشية في الشارع وبالنهار وقبل سفري بيوم لإحياء حفلة خارج مصر، وقعت من حيث لا أدري على وشي، ودخلت المستشفى عملت الإسعافات الأولية وفضلت علامات زرقاء في وشي تقريبا أسبوع، ومرة كعب الشوز دخل في خشبة المسرح وكنت هقع، ومرة حد ماشي ورايا داس على ديل فستاني ووقعت فعلا».

وتابعت: «كتير بشوف ناس في الشارع ممكن يقعوا قدامي، وساعتها بسمي عليه، وأحمد ربنا إنه لم يؤذى من وقعته، ومرة المطرب محمد رشدي في حفلة وطنية وبسبب الإضاءة اللي على وجهه ما شافش نهاية خشبة المسرح وكاد أن يقع، وكوكب الشرق وقعت على المسرح، وإليسا وقعت على المسرح، وهيفاء وهبي وقعت في الكواليس، عارضات أزياء ياما وقعوا وهما ماشيين، وقاموا بمنتهى الثبات، ومطربين أجانب كتير وقعوا على المسرح».  

وأضافت: «افتحوا اليوتيوب هتشوفوا ڤيديوهات من هذا النوع ومصنفة على إنها ڤيديوهات بتضحك، ربنا يكفينا جميعا شر الوقعة».

واختتمت: «عادى يا جماعة حوادث عادية جدا.. ليه بنكبر المواضيع، كلنا بنقع واللي بيقع قدامنا بنسمي عليه ونقوله حمدلله على السلامة مش نقوله أحسن، ارحم ترحم، ارحموا من في الأرض يرحمكم من في السماء».