ميدو: الشياطين يحاولون إشعال خلافات بين مرتضى منصور وشيكابالا
علق أحمد حسام ميدو نجم نادي الزمالك السابق، على أزمة مرتضى منصور رئيس النادي السابق الأخيرة مع محمود عبد الرازق شيكابالا قائد الفريق خلال الأيام الماضية.
وقال ميدو في تصريحات تليفزيونية: الزمالك عنده مشاكل كتيرة جدا الكل عارفها ومش محتاج مشاكل زيادة، حتى لو فيه مشكلة لازم نتجنبها دلوقتي لو من جوا النادي.
وأضاف: الكلام اللي قاله مرتضى منصور فيما يخص شيكابالا مكانش وقته إنه يتقال، والبعض بيحاول يستغل الأزمة عشان يطلع ترند.
وواصل حديثه: بطالب مرتضى منصور، أرجوك كفاية خناقات ومشاكل الزمالك مش محتاجها دلوقتي، فيه حاجات لازم تعديها، النادي بيمر بوقت صعب وكل الناس اللي عايشين في النادي عارفين ده.
واكمل: مينفعش نزود المشاكل الخاصة بالنادي، وشيكابالا لا يستحق هذا الهجوم بكل صراحة، وشيكابالا ملوش أي ذنب في إن فيه فلوس متأخرة على سبورتنج لشبونة.
واختتم ميدو حديثه قائلا: ده مش وقت تصفية حسابات داخل نادي الزمالك في الوقت الحالي الشياطين يحاولون إشعال خلاف مرتضى منصور وشيكابالا، والوقت الحالي ليس مناسبا لتصفية حسابات، والمركب ممكن تغرق، لازم هدوء خاصة الفترة دي.
