بيومي فؤاد غاضبا من هزيمة الأبيض: نفسي الزمالك يعترف إنه وحش

كشف الفنان بيومي فؤاد عن غضبه من تفكير جماهير نادي الزمالك بعد خسارة فريقهم، بعدما هُزم برباعية أمام النادي الأهلي.

تصريحات بيومي فؤاد 

وقال بيومي فؤاد في تصريحات تليفزيونية: "عمري ما غلطت ولا قليت أدبي على جماهير الزمالك، أنا ربنا خلقني أهلاوي إيه المشكلة، الزمالك لو اتغلب من ريال مدريد هيدوروا على أي حاجة غير إنهم وحشين".
 وأضاف بيومي: "شيكابالا قال لعمرو أديب لو كورة هناخد الدوري، يعني إيه كورة هو احنا بنلعب بلي، امتى هتقولوا إنكم اتغلبتوا النهاردة علشان وحشين أو اللي قدامكم كانوا كويسين.

تصريحات بيومي فؤاد عن الزمالك

وتابع بيومي فؤاد:" لما الزمالك خد كأس مصر من الأهلي قلت على الأهلي دا إحنا غلابة النهاردة ووحشين، هما لما يخسروا بيعلقوا شماعات ومبررات الخسارة منها الظلم والتحكيم والمؤامرات والسحر، الزمالك بيتجامل والأهلي بيتجامل الزمالك بيتظلم والأهلي بيتظلم، ولكن هناك أمور أخرى وراء الخسارة لا بدَّ على الزمالك الوقوف أمامها والاعتراف بالتقصير والخلل والمشاكل بعيدًا عن الشماعات".

بيومي فؤاد يهاجم الزمالك 

وتابع:" اشمعنا احنا كلامنا اللي بيبقى مُر ولو الزملكاوي شتم وقل أدبه يبقى كويس، الزملكاوي بيقول لو كرة زيزو دخلت طيب ما كرة أفشة جت في العارضة، ده ماتش 6/1 بيقولوا لو كورة وليد صلاح عبد اللطيف دخلت كان الزمالك كسب، هو ده كلام يُعقل".

كما أوضح الفنان بيومي فؤاد أنه يتعرض لانتقادات دائمًا بسبب دعمه للنادي الأهلي، قائلًا:" قلت الأهلي لعب حلو هي دي قلة أدبي اللى بتشتم عليها في كل حتة، نفسي في مرة الزمالك يطلع يقول احنا اتغلبنا عشان احنا وحشيين لو قالوا ده هيروحوا في حتة تانية، وأرجع أحد أسباب خسارة نادي الزمالك في الدوري الممتاز وتراجع مستواه الفني إلى افتقاد النادي لعدد كبير من لاعبيه هذا إلى جانب الظروف الإدارية التي يمر بها وبعض المشكلات المتعلقة بإيقاف قيد النادي".