جيهان عكاشة تكتب:
إوعى تشيل فوق طاقتك يوم
كثيرا ما يتحمل الإنسان من أجل الآخرين ويقدم الغالي والنفيس لمحاولة إسعادهم ونيل رضاهم، لكن أفعاله تقابل بالجحود والنكران.. الغريب في ذلك أن تجد البعض يستمر في عطائه..القصيدة التالية التي نسجت خيطوها الشاعرة جيهان عكاشة تتناول هؤلاء وتصف حالهم وما قد يلحق بهم.
ضهرك بيشيل عشرين كيلو...
بتحمله ليه مِية وعشرين ؟
فكرت الناس هتصقفلك...؟
وتطيرلك ف الهوا بلالين؟
أو يمكن حد هيندهلك...
ويشوفك واد جامد ومتين؟
قادر تعمل كده دلوقت...؟
قوللي هتعمل إيه بعدين؟
.........
وقت القوة الكل يعوزك...
يطلب إحسانك أو فضلك.
بس أما هتسقط على بوزك...
هتلاقي الكل منفضلك.
...........
إوعى تشيل فوق طاقتك يوم..
كافي تعيش شايل ف حمولك.
كله هيرمي عليك ميت لوم...
لو ماقدرتش تصلب طولك .
...............
شوف مصلحتك فين واتوصى...
واعرف إمتى هترمي الزهر.
أصل خلاص مفهومة القصة..
يوم ماتقع وتموت م القهر.
ولا حد هيرميلك بصة....
ولا حد مسلفلك ضهر.
