عايدة رياض: قبلاتي حقيقية وبصدق.. ومشاهدي مع عادل إمام ضرب نار
تحدثت الفنانة عايدة رياض، عن كواليس تصوير مشاهدها مع الزعيم عادل إمام في فيلم"اللعب مع الكبار" وكذلك ذكريات تصوير فيلم الكيت كات.
مشاهد عايدة رياض مع عادل إمام
وقالت عايدة رياض خلال الجزء الثاني من لقائها ببرنامج "واحد من الناس" تقديم الإعلامي عمرو الليثي: "مشهدي مع عادل إمام لما كنا احنا الاتنين بنضرب بعض المخرج شريف عرفة أخده مشهد واحد، والمشهد ده كان ضرب نار ولا يمكن ينسى، وأنا بعمل بروفة قبل التصوير عادل إمام قال لي خلي بالك واضربي على الهوا ورجلك بس تتفرد مش نضرب شالوت في الجسم، واشتغلنا في تصوير مشهد البوس وبعدين لقيته بيضرب بجد وأنا كنت بقى رياضية رُحت قايمة واديتله بالروسية وعملت مجهود علشان أضربه بالرأس وفعلًا الضرب كان بجد لدرجة إنه قال لي يا بنت اللذينا وبعدين حطني على الترابيزة وبعدها كان فيه تقطيعات".
وأضافت: "الأستاذ عادل إمام ميزته إن لو فيه كلوز للمثل هو بيقف له وقليل أوي اللى يعمل كده، وكان يقف قدامي علشان يديني الإحساس صح بالظبط ويبص لي ويعمل لي حركات".
مشهد القبلات مع عادل امام
وتابعت: "المشهد بتاع العربية اللي كان دمه خفيف، والمشهد الخطير بتاع مديرية الأمن دا ما يتنسيش طبعًا وجامد جدًّا والقبلات اللي فيه، وعجبني الأكشن بتاع حسين فهمي، ولما اتفرجت على الفيلم أنا نفسي اتخضيت وهو بيدي له المنديل يمسح الروج، كل مشاهد الفيلم كان فيها خفة دم".
فيلم الكيت كات
واستطردت: "في نفس السنة عملت مع الفنان محمود عبد العزيز فيلم الكيت كات، وهو وعادل إمام عمالقة تمثيل، وشريف عرفة كان شاب صغير وداود عبد السيد أكبر وأنضج وكل واحد له رؤية، الكيت كات فيه بوس وبيقولوا فيلم إغراء والعمل عايش لأن داوود عبد السيد كان يجي لي يفهم لي الفيلم وأبعاده كلها ويقول لي شريف منير دا حب حياتك وعايز أحس إنك بتحبي قلت له حاضر وقال لي عايز واحدة بتحب حد وبتتمناه وفيه حاجات فرشها لهذا الموضوع وقال لي لما تبوسي شريف منير أنتِ فعلًا بتحبيه بجد، وداوود عبد السيد بيحب الإحساس أوي والسينما إحساس أكتر من أي حاجة".
