"ممكن أضحي بحياتي عشان مراتي".. أحمد فتحي يكشف أسراره لـ عمرو الليثي
كشف الفنان أحمد فتحي، العديد من أسرار حياته خلال لقاءه مع الإعلامي عمرو الليثي في برنامج "واحد من الناس"، فتحدث عن علاقته بزوجتة وكيف أثر عليهم عدم الإنجاب، وذلك على جانب حديثه عن علاقته بوالده الراحل.
وفي السطور التالية يرصد لكم "مصر الآن" أبرز تصريحات أحمد فتحي خلال الحلقة.
- زواجي كان زواج صالونات، وزوجتي أبهرتني بقناعتها لما عرفت كل ظروفي.
- زوجتي كانت عايشة في شقة 250 متر مع أهلها، ووافقت تعيش معايا في شقة 50 متر وقعدنا فيها 11 سنة.
- عدم الإنجاب قربنا مع بعض وأثر في شخصيتنا، وأكيد ربنا ليه حكمة في كل حاجة.
- بعتبر ولاد أختي وولاد أخت مراتي زى ولادي، وأكيد ربنا شايل لينا الأحسن.
- عمرنا ما فكرنا في التبني وكفاية اللي عندنا.
- بشكرها على كل حاجة عملتها معايا ولو أنا كويس دلوقتي يبقى هى السبب.
- مراتي الحب الأول، وأنا راجل بيدي كل فلوسه لمراته.
- مستعد أضحي بحياتي وأرمي نفسي في النار عشان زوجتي.
- والدي كان الوحيد اللي فاهمني ويقدر ينصحني.
- مش بحب حد ينصحني ولا يعلق على سلوكي غير والدي.
- والدي قالي الحلم لازم يكون ليه إيدين ورجلين عشان يعيش ولازم تتعلم.
- نفسي يكون مات فخور بيا، وكان تعبان آخر 5 سنين في حياته.
- في لحظاته الأخيرة مكنتش موجود، وبقوله سامحني لو قصرت في حقك.
- قبل التمثيل اشتغلت على عربية كبدة، وفي فندق ومندوب مبيعات في شركة شوكولاتة.
- سبت التمثيل لمدة سنة وسافرت ورجعت عليا ديون كتير وقررت أرجع للتمثيل.
- قلت لمراتي أنا ظروفي صعبة وليكي الحق تنفصلي قالتلي أنا معاك.
- فيلم بنات العم كان أول محطة في السينما وبداية شهرتي وربنا كرمني.
- اتعرضت للظلم في التمثيل، وفي ناس كانت بتقول عليا حمار مش بعرف أمثل.
- في فيلم الحرب العالمية الثالثة كان بيرشوني لمدة ساعة ونص وأقعد 3 ساعات على ما اللون يتشال.
- نفسي أقدم دور لذوى الإحتياجات الخاصة وأعرض ما يتعرضون له من تنمر وقهر.
- طول عمري تخين وكنت بتضايق من تنمر صحابي عليا وأنا صغير.
