محمد رمضان: سعيد صالح دخلني عالم التمثيل.. ومسلسلى 2024 إخراج محمد سامى

حل الفنان محمد رمضان ضيفاً على برنامج صاحبة السعادة، وقال العديد من التصريحات، على مدار حلقتين كاملين بمناسبة عيد الفطر المبارك، وبعد نجاح مسلسل جعفر العمدة الذي عُرض في السابق الرمضاني 2023، وحقق نجاح كبير.

محمد رمضان وعلاقته بسعيد صالح

وقال محمد رمضان: "سعيد صالح صاحب فضل عليّ وأول إيد حقيقية اتمدت لي ودخلنى عالم الاحتراف واتعلمت منه المسرح منه، وحاجات كتير فادتنى بعيد عن المسرح".

وتابع محمد رمضان: "وأنا عامل عبده موته جالى مسلسل وكانت فرصة لا تعوض مع مخرج كبير جدا في الدراما، بس حسيت إنى مش جاهز أدخل السباق ده واعتذرت وقالوا عليّ مجنون، وقررت أدرس المسلسلات اللى نجحت قبل كده فلقيت التيمة الشعبية والصعيدية والانتقام، وحطيت كل الحاجات دى قدامى وقلت لما أعمل مسلسل عاوز كل دول في المسلسل".

وعن أعماله الجديدة قال محمد رمضان: "إن شاء الله عندى فيلم ع الزيرو في عيد الأضحى، وعندى حفلات غنائية، وشغالين حاليا على فكرة مسلسل رمضان 2024 هايكون من تأليف وإخراج محمد سامى أيضا".

وقال محمد رمضان: أنا عاشق للماركيتنج وأفهم وأعي أهميته في حياة أي شخص في بناء أي براند واسم.

وأضاف محمد رمضان: أهمية الماركتينج أني أزع الثقة بين الجمهور والمنتج أو هذا الشخص فبالتالي لازم يتعمل بثقة ودلائل زي إعلانات زمان لو  مثلًا بعمل إعلان عن مسحوق غسيل يجيبه البقع ولما يحطه المسوق تروح.

وتابع محمد رمضان: وكذلك لو بعمل ماركينتج لاسمي لازم يكون عندي دلائل أني ما أطلعش أقول أنا نمبر وان وأسكت لأ يقول أن في هاشتاج اسمي على تيك توك عشرة مليار و800 مليون بنزل الخبر أو بطلق المقولة وعارفة أن جمهور باقي النجوم دي هيبدأ رحلة بحث فلازم لما يوصل للنتيجة يقول هو فعلا مفيش اسم متخطيه فحقه يقول أنا نمبر وان، ولازم يكون عندي حاجات في مشواري ما حدش تخطاني فيها أو لو حد تخطى يبقى بعد ما أنت قلت.

محمد رمضان يتحدث عن عمر الشريف 

تحدث محمد رمضان عن عمر الشريف، وكيف ساعده في مشوراه الفني، قائلًا: عمر الشريف كان أبويا الروحي وكان بمثابة طوق نجاة اتحدف لي وأنا بغرق في بحر اليأس، لأني ما كنتش بشتغل وقتها ومفيش دليل يقول أني ممكن أكمل وأنجح، وطلع النجم العالمي الوحيد في مصر يقول ده اللي اختارته يكمل مسيرتي وشايفه هيكون أحسن ممثل في مصر وما فهمتش كلامه وما فدنيش على مستوى الشغل وجالي أدوار ولكن أداني قوة وحسسني أني ماشي صح"

وتابع محمد رمضان: بدأت أقنع نفسي أن هعتبر أني ما سمعتش كلام عمر الشريف علشان لو صدقته مش هعمل به.

وأوضح محمد رمضان:  إيناس بكر مديرة أعمال عمر الشريف مرة  قالت لي أنت متأكد من اسم محمد رمضان ومتأكد أنك عاوز تكمل مشوارك الفني به، قلت لها والله اه، ورد عمر الشريف قال لها ده أحلى اسم لأن محمد أكتر اسم موجود في مصر ورمضان أكتر شهر ما تحسيش به غير في مصر ومحمد رمضان يعني مصر.

مش طموحي أكون ممثل عالمي 

وأكد محمد رمضان أنه لا يطمح لأن يكون فنان عالمي، موضحًا: مش في طموحي أني أكون عالمي حتى الآن لأن الممثل فرد بيمثل فئة أنا ممثل مصري وأنا بمثل جميع الفئات المصرية ولو عشت 100 سنة مش هعمل واحد في المية من الشخصيات اللي ينفع أعملها من بلدي فعمر ما كان طموحي أمثل بره أو أمثل شخصيات مش عايشة جوه محيطنا العربي والمصري.

وتابع: الأسرع في الانتشار والوصول للعالم خط المزيكا وهو أسرع من التمثيل، لأني من خلاله سهل أوصل لباقي الكر الأرضية أسرع من التمثيل.