أحمد السقا عن دوره في مسلسل حرب: كنت بنام على مسامير مبرودة.. واشتغلت من طبقة صوت بتعالج منها لحد دلوقتي

كشف الفنان أحمد السقا العديد من الأسرار من كواليس تصوير مسلسل حرب، خلال حواره مع الإعلامية فاطمة مصطفى، المذاع عبر برنامج الراديو بيضحك.

وقال السقا إنه كان ينام على سرير مكون من مسامير خلال أحداث مسلسل حرب، الذي يعرض حاليا بداية من الثلث الأخير من موسم رمضان 2023.

واضاف أحمد السقا : "ده كان بجد وكانت مسامير بس كانت مسامير مبرودة ليها طريقة قعدة معينة وحد بيمسكني لحد ما أنام على ضهري ومقدرش أقوم لوحدي لازم حد يقومني عشان مضغطش نفسي عليها واتخرم".

أحمد السقا عن مسلسل حرب

وتابع: "كنت مرعوب من عرض المسلسل في التلت الأخير من رمضان وبقيت بدعي ربنا يارب متخذلنيش، وبفضل الله وأحمد نادر جلال قدرنا نطلع المسلسل بالشكل اللي يليق، وأنا بسميه حفيد العظماء مكنش بينام بنخلص تصوير ويقعد على المونتاج وتصحيح الألوان".

أحمد السقا من مسلسل حرب
وتابع أحمد السقا: "البزاوي كان بيتروش مني، إذا تواجدنا في أي مكان يفضل يبص يمين وشمال ويقول يا جماعة انتو مطلعني إرهابي قدام السقا طب حد يمسكه لحد ما أخلص المشهد شغال بفوبيا السقا، إنسان جميل وراقي وناضج لدرجة أبعد ما تكون".

تحدث السقا عن تفاصيل مشاركته في مسلسل حرب مع الفنان محمد فراج:" بالنسبة لشكلي المرهق في المسلسل هو إني خسيت ونزلت وزني الفترة اللي فاتت؛ لأني كنت باخد كورتيزون ولما وقفته بعناية الأطباء بقيت فرحان بشكلي في المسلسل".

وأضاف: "وخدت قرار إني مش هشتغل دور الإرهابي بالشكل التقليدي اللي بيكشر ويزعق ويتكلم بلغة الدين ديمًا أنا هعمله إنسان عادي وجاحد عشان يوصل للناس".

وتابع: "أنا بشتغل مع فريق عمل قعدنا نشوف هنعمل فرق السن إزاي، والدقن اللي كنت بعملها في الأول كان تركيبها بياخد ساعة ونص لأنها بتترسم شعرة تلو الأخرى عشان تبان طبيعية، أما فيما يخص هدوء الشخصية لما تشوفي النهاية هتعرفي إن الراجل ده مش صاحب مبدأ ومش عايز احرق الأحداث، واللي كان بيحركه حاجة تانية خالص".

وقال أحمد السقا عن خوفه من تقديم دور الشر :" لا خالص، بعد ما قعدنا ووافقت وطلبت التأجيل الكام يوم دول وكلمت فراج ولعب دور جميل وساندني وبريقه منعكس عليّا، كل الناس كانت مستغربة إني وافقت، وكان هدفي إني أتكره؛ لأني لو اتحبيت وأنا إرهابي تبقى مصيبة سودا، الحمد لله ربنا وفقني في تحضير الشخصية مع فريق العمل ووصلنا لشكل خارجي كويس".

واستطرد أحمد السقا: "اشتغلت من طبقة صوت لحد دلوقتي تعباني.. الطبقة عريضة.. لحد دلوقتي باخد أدوية، وقولت مش هعمله بالشكل التقليدي وأجري على الله، والحمد لله لاقى استحسان الناس".

تصريحات أحمد السقا عن مسلسل حرب 

وقال أحمد السقا: "مكنش فعلًا عندي حاجة في الدراما الرمضانية السنة دي، وقبل شهر رمضان بأيام معدودة لقيت الراجل بتاعي محمد حسن مدير أعمالي بيكلمني بيقولي عايزك ضروري".

وتابع: "في العادي بتاعي لما بيبقى عندي يوم أجازة مش بحب اتكلم في شغل، بروح أتمرن وأركب خيل ومبعملش حاجة تاني.. ولقيته بيقولي عندي مصيبة في البيت ومش هينفع في التليفون".

وأضاف أحمد السقا:" روحتله على البيت وقالي كنت قاعد مع فلان وفلان كلموني عشان هنعمل مسلسل في رمضان وهنبدأ تصوير يوم التلات الجاي قولتله أنت بتهزر قالي لا.. فطلبت أقعد مع أستاذ أحمد نادر جلال والمؤلف هاني سرحان تاني يوم الصبح على الأقل يحكولي".

وأردف أحمد السقا: "وقولت يا واد أنت لو خدت الريسك ده هيبقى حاجة من اتنين يا هتلبس في حيطه ياما هتبقى كنست تاريخك كله ويبقى نقطة ومن أول السطر.. وكانت مغامرة تستحق الريسك.. وبعدين وافقت.. ولكن قولتلهم مش هنصور التلات هنصور السبت.. عشان أكون لحقت أقرأ وأذاكر".

أبطال مسلسل حرب
 

يشارك في مسلسل حرب العديد من الفنانين، منهم: أحمد السقا، محمد فراج، سارة الشامي، أحمد سعيد عبد الغني، إنجي المقدم، إيناس كامل، إبراهيم كمال، عماد الطيب، أحمد أبو زيد، مصطفى منصور، محمد يوسف، أحمد أبو زيد.