بعد اتهامها لها بالعمل عن طريق الواسطة.. ريهام سعيد تعتذر لـ أسما إبراهيم
قدمت الإعلامية ريهام سعيد، اعتذارا للإعلامية أسما إبراهيم، بعد أن هاجمتها العام الماضي واتهمتها بالظهور على الشاشة من خلال الواسطة، وأنها لا تمتلك الموهبة الإعلامية.
وجاء ذلك من خلال منشور نشرتة عبر حسابها الرسمي بموقع التواصل الاجتماعي "فيسبوك" وقالت فيه:"الاعتراف بالحق فضيلة والاعتذار دائمًا لما يكون واجب عمره ما بيصغر بالعكس بيكبر و بيبين تربية الواحد والحمد لله الميزة الوحيدة اللي فيا إني متربية".
وتابعت قائلة: "من سنه هاجمت الأستاذ طارق نور عشان أسما إبراهيم فجاءة ظهرت واللي كان بيتقال إنها بتنتج لنفسها ومعرفش ده حقيقي ولا لأ ولا ده المهم وساعتها كانت ضعيفة بالنسبالي جدًا إنها تحاور نجوم قامة وكبار وحسيت ساعتها إن المسألة بقت عبارة عن حد معاه فلوس فيظهر على التلفزيون بعد ما سنة عدت أنا بعتذر للأستاذ طارق نور اللي أثبت أن لما الاستاذ يتكلم التلاميذ تسكت أكيد كان عنده نظرة".
واكملت:"أسما السنة دي عاملة توليفة شاطرة أوي بين السخونة والصدق و عدم الفبركة والضحكة وإظهار الحقيقة والمهنية والمحايدة وكل حاجه حلوة...يمكن في الأول كان في عدم خبرة ورهبة الكاميرا بس السنه دي أبدعتي".
وتابعت ريهام سعيد:"بما إني شخصية بتحب كل حاجه تبقي مفهاش غلطة أنا فاهمة أنا ليه كتبت كده وأنا ضد تقييم زملاء بس برضوا كان صعب أعتبر أسما زميلة في سنة واحدة بعد ٢٥ سنة..أسماء إبراهيم أنا كنت غلطانة و أمتعتينا بابتسامتك الحلوة وموهبتك ظهرت ببراعة كفاية إن في ناس بقالهم سنين ومتعلموش حاجة".
واختتمت حديثها قائلة:"أنتي خارج تقييمي أو تقييم غيري محدش ليه أنه يقيم أنا كنت غيرانه على المهنة في وقت ظهر ناس كتير أوي مالهمش معنى ، أهلا بيكي زميلة جميلة رقيقة مع ضيوفك بتحطي السم في العسل البرنامج رقم واحد في رمضان هارد توك إن شاء الله من نجاح لنجاح وكل التحية لميلاد أبي رعد الجندي المجهول وراء نجاح القاهرة والناس وصانع النجوم الأول.. أنا آسفة".
